මාස්ක් දාගෙන සැනටයිසර් නාගෙන හිටපු මහ අමුතුම අවුරුද්දක අවසාන පැය කිහිපය

මාස්ක් දාගෙන සැනටයිසර් නාගෙන හිටපු මහ අමුතුම අවුරුද්දක අවසාන පැය කිහිපය ..

රැස් කරගෙන හිටපු කුණු අස් කරලා ගෙවල් දොරවල් සුද්ද කරලා කට්ටිය 2021 ට ලෑස්ති ඇති නේද ?

ඇණේ එතනම තියෙද්දී කැලැන්ඩරේ මාරු උනා කියලා , කිරි ඉතිරේවා නව වසරේ කියලා කිව්වා කියලා , 0 තිබ්බ තැනට 1 දැම්මා කියල, අලුත් අවුරුද්දේ හැදෙනවා හැදිල්ලක් ආයෙ ලොවෙත් , ලියලා ස්ටේටස් දැම්මා කියලා අළුත් අවුරුද්දෙ, කිසිම දෙයක් වෙනස් වෙන්නේ නැහැ ,

අද පායපු මේ ඉර හඳම තමයි හෙටත් පායන්නෙ ,

අවුරුද්දත් එක්ක අලුත් වෙන්න ඕනේ නම් , ගෙවල් දොරවල් හෝදලා විතරක් වැඩක් නැහැ , ඔළුවත් හෝදගන්න ,

වැඩිපුරම කුණු තියෙන්නේ පොළවේ නෙමෙයි ඔළුවේ …

වැඩිපුරම අනවශ්‍ය දේවල් තියෙන්නෙත් ඔළුවේ ..

ඒ වගේම වැඩිපුරම හයිය , දහිරිය තියෙන්නෙත් ඔය ඔලු ගෙඩිය ඇතුලෙම තමයි ,

මේ අවුරුද්දේ හිත රිදවපු මිනිස්සුන්ව හෝදලා ඇරලා , මේ අවුරුද්දේ දුෂ්ට කම් කරපු මිනිස්සුන්ට සමාව දීලා එයාලවත් එලියට දාලා ,ඔයාට මගෑරිච්ච ආදරණීය සුන්දර මිනිස්සු ටික ඔළුව උඩ හරියෙන් තියාගෙන , මොළේට යන පාර බ්ලොක් කරගෙන හිටපු , පරණ මතක ටික වැකුම් කරලා දාලා ,මනුස්සකම් , එක්ක අළුත් හිනාවක් මූණට දීලා ,පොඩියට හරි අලුතෙන්ම ජීවිතේ පටන් ගන්න ..

දියුණු වෙන්න ප්ලෑන් ගහන එක ඔබේ වැඩක් , හැබැයි අලුත් අවුරුද්දේ හොඳ මනුස්සයෙක් වෙන්න, රටට සේවය කරන්න , කියලා මහ ලොකු දේවල් නම් කරන්න ඕනේ නැහැ ,

මනුස්සයෙක් විදිහට තමන්ට දැනෙන සියලුම හැඟීම් අනිත් අයටත් ඒ විදිහටම දැනෙන බවත් , තමන්ට කසාද බඳින්න , දික්කසාද වෙන්න , නොබඳ ඉන්න , දරුවෝ හදන්න , තමන්ට ඕන විදිහට ජීවත් වෙන්න තියන අයිතිය අනිත් යටත් එහෙම්ම තියනවා කියලාත් මතක් කරගෙන , තමන් වගේම මේ ලෝකේ අනිත් හැමෝම ඇට , ලේ , මස් , නහර වලින් හැදිච්ච හැඟීම් දැනීම් දැනෙන මිනිස්සු කියලා මතක තියාගෙන ජීවත් වුනානම් ඒ හොඳටම ඇති ..

අවුරුද්ද වෙනස් උනා කියලා , කිසිම දෙයක් වෙනස් වෙන්නේ නැහැ ඔයා වෙනස් වෙන්නේ නැතුව , ඔයා අලුත් වුනොත් අවුරුද්ද පරණ උනත් කමක් නැහැ , ජීවිතේ අලුත් වෙනවා ..ඒකයි ඇත්ත …

කටට ආපු පළියට හැඩ වැඩ දාලා

“ඔබට සුබ අලුත් අවුරුද්දක් වේවා “කියලා මම කිව්වා කියලා ඔබට වෙන සුබක් නැහැ ,

මම මගෙ අවුරුද්ද සුබ කරගන්නවා..

ඔබේ අවුරුද්ද සුබ කරගන්න එක ඔබේ වැඩක් ..

අනිශා ජයකොඩි